Jam 3 | MED | STEP | Na nga angmᵾn! Enim ik mbo wu ou ndupa muⱡi nᵾmbᵾⱡᵾi. Nambuⱡ emel, enim pᵾnmin! Got ndi, wamp kᵾmp tᵾmba ui ei kᵾn, tᵾn ik mbo wu mbᵾ, ama ronduⱡ mundpa kᵾmp tᵾpa, wamp wei mbᵾ kᵾn, raka raka nimba kᵾmp tᵾmba.

James 3

Tᵾn Nga Keta Anmbil Ei Rᵾp Itᵾmin

1 Na nga angmᵾn! Enim ik mbo wu ou ndupa muⱡi nᵾmbᵾⱡᵾi. Nambuⱡ emel, enim pᵾnmin! Got ndi, wamp kᵾmp tᵾmba ui ei kᵾn, tᵾn ik mbo wu mbᵾ, ama ronduⱡ mundpa kᵾmp tᵾpa, wamp wei mbᵾ kᵾn, raka raka nimba kᵾmp tᵾmba. 2 Tᵾn wamp kump kᵾm uⱡ kit mbᵾ etmᵾn. Wote, wamp nam ti, ik kit ni nandᵾtᵾm wamp ei, wamp kun kai morum. Wamp ei ndi, elim nga kᵾng kᵾⱡ, kapⱡa rᵾp etpa kai mondᵾmba. 3 Kng os keta ila ain ti, kan rop gi ndup pendpᵾn kᵾn, mep andᵾrmin ei, tᵾn nga ik ei, teng ndangga nimbun etmin. 4 Wote enim pilᵾi! Nu sip kᵾⱡ mel mam kᵾⱡ, kᵾpkᵾ mam mat ropa pungaⱡ ndupa mepa, num kuta ila purum. Wote, nu sip mepa andrᵾm wu ei ndi, mel kel kot tᵾpa kun elinga, elim pᵾtᵾm ei mel purum. 5 Ei mel ku, tᵾn nga keta anmbil ei mel kel koⱡ, tᵾn nga kᵾng ila petᵾm. Wote, ik mam mat, tᵾn nga keta ila ekit orum. Enim punmᵾn ei, ndip kel kot ndi, puⱡ mondpa, nomba mam etpa, nde pana mam mbᵾ nomba pora ndurᵾm. 6 Tᵾn nga keta anmbil ei, ndip mel, kapⱡa. Keta anmbil ei, tᵾn nga kᵾng ila pepa, ik kit elpa elpa mbᵾ oⱡa tᵾpa, wamp etᵾpa kit mondrum. Wote, wamp kᵾng kᵾⱡ pᵾi, etpa kit mondrum. Uⱡ i etmᵾn ei ndi, ndip kona ei ndi, elim ndip ei, kende rorum.

7 Kng owa, kui, kᵾi, wimbᵾ na, num kuta mana orunga oma na mel tetᵾm mbᵾ, wamp ndi, etᵾk ek ndurᵾng, wote akup etᵾk ek ndormᵾn. 8 Wote, wamp ti ndi, keta anmbil ei, etpa ek ndumba mel, kapⱡa mon! Mel kit ei ndi, wamp ropa kundi uⱡ ei nga, ik kit mat petᵾm.

9 Keta anmbil ei ndi, tᵾn nga Wu Nuim ei kᵾn, Tipam raⱡ nga mbi paka rondurmun. Wote, keta anmbil tenda ei ndi ku, tᵾn, Got elim mel mil kan etpa itim wamp mbᵾ kᵾn, nᵾmp kit mondᵾrmᵾn. 10 Keta tenda ila ku mbi paka rondurmun. Wote, keta ila ku, wamp mat nᵾmp kit mondᵾrmᵾn. Na nga angmᵾn! Uⱡ ei, iti nᵾtᵾmin mon! 11 Nu pit ti kᵾn, num kuta nu ei kᵾn, tᵾpa tenda etpa orum ei? 12 Na angmᵾn! Nde pik ila, nde olip mong rumba ei, muna nde wain ila, nde pik mong romba ei? Ei mel ku, num kuta ila, nu kai ti, ekit ui nawᵾmba mon!

Pilpa Kungᵾndi Mbo Raⱡ Etpa

13 Enim nga ruk ting ila, wu pilpa kungᵾndi ti morum ei? Wamp ti moⱡum ndam, elim nga mul uⱡ kai ei, pilpa kungᵾndi kai ila, ekit orum uⱡ mbᵾ, etpa tᵾpa ora ndangga! 14 Wote, enim nga numan ila wᵾlᵾk rok, popᵾⱡ mondᵾk, wote enim nga numan ila en enim mbi ou timin, nᵾk pilik, wote enim ndi ik kep nok ik kupa ei kambilik pendᵾk iti nᵾtᵾi! 15 Pilpa kungᵾndi ei, muⱡ kona ila tepa mana ui nawᵾrᵾm. Wote, ei ya mᵾi kona ila, numan unt nga ei, pilpa kungᵾndi kit ei nga tipam ei, Seitan. 16 Wote, wamp mat kᵾn, wᵾlᵾk rok, nindiⱡim nᵾk etmin wamp mbᵾ molk, kai mundi namᵾndᵾk, uⱡ kit mbᵾ mint etmin.

17 Wote, mul kona ila pilpa kungᵾndi mana orum ila, kuimp tepa uⱡ kun kai pilpa kungᵾndi ila, moⱡpa kundi uⱡ mbᵾ, numan ngᵾk, numan kai pendᵾk, wamp numan ngᵾk, wamp mbᵾ kᵾn numan wang nduk, wamp mat nga ik kum tek, wote wamp kont kulk, uⱡ kun kai mbᵾ etmin. Wote wamp elpa elpa mbᵾ kᵾn, numan tenda ei mint pendᵾtmᵾn. 18 Moⱡpa kundi uⱡ ei nga paka rormᵾn wamp mbᵾ, moⱡpa kundi uⱡ ei nga rᵾng mbo kai mbᵾ mundᵾk, wote ei kᵾn, uⱡ kun kai mbᵾ rᵾng mel mᵾlᵾ ropa oⱡa orum.